الرسائل السلبية وتأثيرها على طفلك
🔹️أنت غبي...يا فاشل
🔹️مفيش فايدة منك
🔹️أنت عمرك ما هتفلح
🔹يا كسوول
الجمل دي اتقالت لك قبل كده؟! طيب لسه فاكر/ه مشاعرك وأحاسيسك وقتها كان ايه؟!
🔹️أنت كأب تصور أنك في عملك والمدير وصفك بأنك موظف فاااشل وغير منظم وبطيء وغيرها من الصفات السلبية، شعورك هيبقى ايه؟
🔹️وأنت كأم إذا زوجك وصفك بالغير منظمة، فاشلة، وزوجة غير ناجحة وغيرها من الصفات السلبية، شعورك هيبقى ايه؟
🔹️وغيرها من الكلمات والصفات والرسائل السلبية اللي يستخدمها بعض الأهالي في التعبير عن مشاعرهم أو وصف اللي شايفينه من تصرف ولادهم على حسب تصورهم هما (الأهل) دون الوضع في الاعتبار مشاعر الطفل المستقبل لهذه الرسائل.
أو أحياناً بيكون عندهم تصور أنهم كده بيحفزوا ولادهم على النجاح أو تغيير سلوكهم أو صفاتهم للأفضل.
🔹الرسائل السلبية تنطبع في مخ أطفالنا زينا احنا الكبار بالضبط ومع الوقت اللي بيحصل للرسائل السلبية دي أن مخنا بيصدقها ويعتبرها حقيقة، ويمشي في طريق تحقيقها لأنه خلاص شايف نفسه بالصفة السلبية دي.
🔸️عشان كده على اختاري الرسائل الإيجابية كأداة الوصل بينك وبين أولادك، وعليكِ اختيار هذه الرسائل الإيجابية لبناء أولادك وتربيتهم تربية إيجابية صالحة، والرسايل الإيجابية دي بتكون من خلال التحفيز والتركيز عالإيجابي في سلوك الطفل، ونقاط القوة وما يميز الطفل.
🔸️فأي موقف يمر بك تقدري توصليه من خلال الرسائل الإيجابية أو السلبية، عشان كده لازم تفكري في الهدف اللي عايزة توصلي له من خلال تربيتك لولادك.
فالحب والرحمة والتعاطف عشان ترسليهم لأولادك محتاجه الرسائل الإيجابية. عشان تكون رسالة مُنسقة وفيها فائدة وتؤتي ثمارها.
🔹على عكس الرسائل السلبية المدمرة وإن كانت من وجهة نظر البعض أنه هدفها التهذيب فهي في الاخر سلبية.
مثال: الطفل الغير موفق في دراسة المواد العلمية بعض الاهل يقولون له أنت غبي، ما بتفهمش، الموضوع سهل وبسيط ،العيب فيك، أنت مفقود الأمل فيك.
كل دي رسائل سلبية و مع الوقت الطفل هيصدقها ويصدق أنه غبي وبعدها هيتصرف على أنه فعلا غبي.
الأفضل في هذا الموقف: التعاطف والحب مع الطفل ازاي؟؟ أنا مقدره يا حبيبي أن المسألة صعبة لكني واثقة أنك ذكي وهتقدر على حلها وممكن أساعدك اذا احتاجتني.
ايه رأيك ممكن نفكر في حل؟
أنت مجبتش الدرجة النهائية في الاختبار لكن جاوبت المسألة بطريقة مرتبة وده معناه أنك منظم وبتفكر تفكير منطقي.
🔸️بالطريقة دي قدرنا نبني جسر مع ولادنا من الرسائل الإيجابية التي تقويهم لننعم بالتربية الإيجابية المثمرة
دمتم ايجابين
بقلمي
شيماء الجميل
إرسال تعليق